ვინ არიან ის ფიზიკური პირები, რომელთა შესახებ ინფორმაცია შეიტანება გადახდის წყაროსთან დაკავებული გადასახადის ყოველთვიური დეკლარაციის დანართ ,,ე“-ში?

დეკლარაციის დანართ ,,ე“-ში შეიტანება ყველა იმ ფიზიკური პირის შესახებ ინფორმაცია, ვისზეც გადახდის წყაროსთან გადასახადის დაკავების ვალდებულება არ აქვს განაცემის გამცემ პირს, მაგრამ განაცემის მიმღებ პირს ევალება შესაბამისი საგადასახადო დეკლარაციის საგადასახადო ორგანოსთვის წარდგენა.

ეს ფიზიკური პირები არიან:

• ინდივიდუალური  მეწარმე;
• ნოტარიუსი, კერძო აღმასრულებელი;
• მიკრო/მცირე და ფიქსირებული გადასახადის გადამხდელის სტატუსის მქონე      ფიზიკური პირები შესაბამისი საქმიანობის ნაწილში;
• დღგ-ის გადამხდელად რეგისტრირებული ფიზიკური პირები.

გადახდის წყაროსთან დაკავებული გადასახადის ყოველთვიური დეკლარაციის დანართ ,,ე“-ში შეიტანება თუ არა იურიდიულ პირებზე განხორციელებული განაცემების შესახებ ინფორმაცია?

დეკლარაციის დანართ ,,ე“-ში იურიდიულ პირებზე განხორციელებული განაცემების შესახებ ინფორმაცია არ შეიტანება, დანართში შეიტანება მხოლოდ ფიზიკურ პირებზე განხორციელებული განაცემების შესახებ ინფორმაცია.

რა განაკვეთით იბეგრება შემოსავლის სახეები, რომლებიც ექვემდებარება გადახდის წყაროსთან დაბეგვრას?

• ხელფასი - 20%-ით;
• პროცენტი -5%-ით;
• დივიდენდი -5%-ით;
• რეზიდენტი ფიზიკური პირის მიერ მიღებული როიალტი -20%-ით;
• სათამაშო აპარატების მეშვეობით მოწყობილ აზარტულ ან/და სისტემურ-ელექტრონული ფორმით მოწყობილ აზარტულ ან/და მომგებიან თამაშობებში (გარდა სისტემურ-ელექტრონული ფორმით მოწყობილი წამახალისებელი გათამაშებისა) მონაწილე პირის მიერ თამაშობის მომწყობი პირისგან, მათ შორის, სისტემურ-ელექტრონული სათამაშო ანგარიშიდან, გატანილი თანხა- 5 %-ით, გარდა  უცხო ქვეყნის მოქალაქეების მიერ სისტემურ-ელექტრონული ფორმით ორგანიზებულ აზარტულ თამაშობებში ან/და სისტემურ-ელექტრონული ფორმით ორგანიზებულ ტოტალიზატორის თამაშობებში მონაწილეობის შედეგად მიღებული მოგებისა და სისტემურ-ელექტრონული სათამაშო ანგარიშიდან გატანილი თანხისა;
• შავი ან/და ფერადი ლითონების ჯართის და ნარჩენების მიწოდების შედეგად მიღებული შემოსავალი - 3%-ით.

რომელი შემოსავლები ექვემდებარება გადახდის წყაროსთან დაბეგვრას?

გადახდის წყაროსთან დაბეგვრას ექვემდებარება შემდეგი სახის შემოსავლები:

• ხელფასის სახით მიღებული შემოსავლები;
• დივიდენდები;
• პროცენტები;
•  როიალტი, გარდა დღგ-ის გადამხდელად რეგისტრირებული ფიზიკური პირის მიღებული როიალტისა;
• სათამაშო აპარატების მეშვეობით მოწყობილ აზარტულ თამაშობებში ან/და სისტემურ-ელექტრონული ფორმით ორგანიზებულ აზარტულ ან/და მომგებიან თამაშობებში (გარდა სისტემურ-ელექტრონული ფორმით მოწყობილი წამახალისებელი გათამაშებისა) მონაწილე პირის მიერ სათამაშო აპარატების სალონის მომწყობისგან ან სისტემურ-ელექტრონული სათამაშო ანგარიშიდან გატანილი თანხა (გარდა უცხო ქვეყნის მოქალაქეების მიერ სისტემურ-ელექტრონული სათამაშო ანგარიშიდან გატანილი თანხისა).
• შავი ან/და ფერადი ლითონების ჯართის და ნარჩენების მიწოდების შედეგად მიღებული შემოსავალი;
• ფიზიკური პირის, რომელიც ინდივიდუალურ მეწარმედ რეგისტრირებული არ არის, მიერ 1000 ლარზე მეტი ქონების უსასყიდლოდ გადაცემით მიღებული შემოსავალი;
• ფიზიკური პირის (გარდა ინდივიდუალური მეწარმისა, დღგ-ის გადამხდელად რეგისტრირებული ფიზიკური პირისა, ნოტარიუსისა, კერძო აღმასრულებლისა, მიკრო/მცირე ბიზნესის სტატუსის მქონე ფიზიკური პირისა და ფიქსირებული გადასახადის გადამხდელის სტატუსის მქონე ფიზიკური პირისა, შესაბამისი საქმიანობის ნაწილში), მიერ მომსახურების გაწევით მიღებული შემოსავალი. 

როდის უნდა წარვადგინოთ გადახდის წყაროსთან დაკავებული გადასახადის ყოველთვიური დეკლარაციის დანართ ,,ე“-ში განაცემების შესახებ ინფორმაცია?

დეკლარაციის დანართ ,,ე“-ში ფიზიკურ პირებზე განხორციელებული განაცემების შესახებ ინფორმაცია წარმოდგენილი უნდა იქნეს იმ თვის გადახდის წყაროსთან დაკავებული გადასახადების დეკლარაციაში, როდესაც განხორციელდა მიღებული მომსახურებისათვის ფულადი ფორმით ანაზღაურება და მისი ფაქტობრივად გაცემა.

ის ფიზიკური პირები, რომელთა განაცემების შესახებ ინფორმაცია შევიტანეთ გადახდის წყაროსთან დაკავებული გადასახადის ყოველთვიური დეკლარაციის დანართ ,,ა“-ში, ასევე, უნდა შევიტანოთ თუ არა ამავე დეკლარაციის დანართ ,,ე“-ში?

დეკლარაციის დანართ ,,ე“-ში არ შეიტანება იმ ფიზიკური პირების შესახებ ინფორმაცია, რომელიც უკვე შევიტანეთ დანართ ,,ა“-ში, მათ შორის, ორმაგი დაბეგვრის თავიდან აცილების შესახებ საერთაშორისო შეთანხმებით განსაზღვრული საგადასახადო შეღავათით მოსარგებლე არარეზიდენტი ფიზიკური პირები.

გადახდის წყაროსთან დაკავებული გადასახადის ყოველთვიური დეკლარაციის დანართ ,,ე“-ში შეიტანება თუ არა შეძენილ საქონელზე განხორციელებული ანაზღაურების შესახებ ინფორმაცია?

დეკლარაციის დანართ ,,ე“-ში არ შეიტანება შეძენილ საქონელზე განხორციელებული ანაზღაურების შესახებ ინფორმაცია, დანართში შეიტანება მხოლოდ ფიზიკური პირების მიერ გაწეულ ნებისმიერ მომსახურებაზე განხორციელებული ისეთი განაცემების შესახებ ინფორმაცია, რომელიც არ ექვემდებარება გადახდის წყაროსთან დაბეგვრას.

გადახდის წყაროსთან დაკავებული გადასახადის ყოველთვიური დეკლარაციის დანართ ,,ე“-ში შეიტანება თუ არა დღგ-ს გადამხდელი ინდივიდუალური მეწარმის, ან სხვა ფიზიკური პირის შესახებ ინფორმაცია?

დეკლარაციის დანართ ,,ე“-ში შეიტანება დღგ-ის გადამხდელ ფიზიკური პირზე, მათ შორის, დღგ-ის გადამხდელ ინდივიდუალურ მეწარმეზე, განხორციელებული განაცემების შესახებ ინფორმაცია.